بھارت: آنجہانی اندرا گاندھی کی پوتی پرینکا گاندھی زیر حراست

نئی دہلی (ویب ڈیسک) بھارتی ریاست اترپردیش کی پولیس نے کانگریس کی جنرل سیکریٹری اور آنجہانی بھارتی وزیراعظم اندرا گاندھی کی پوتی پرینکا گاندھی کو حراست میں لے کر نامعلوم مقام پر منتقل کردیا ہے۔ یرینکا گاندھی کی گرفتاری کو غیر قانونی قرار دیتے ہوئے ان کے بھائی اوررکن پارلیمنٹ راہل گاندھی نے شدید ردعمل ظاہر کیا ہے۔

بھارتی ذرائع ابلاغ کے مطابق سون بھدر میں زمین کے تنازعے پر ہونے والی فائرنگ کے نتیجے میں 17 جولائی کو دس افراد ہلاک ہوگئے تھے تو متاثرہ خاندان سے اظہار ہمدردی کے لیے پرینکا گاندھی جارہی تھیں کہ اترپردیش پولیس نے جانے سے روک دیا جس پر انہوں نے احتجاجاً اپنے حامیوں کے ہمراہ وہیں دھرنا دے دیا۔

پولیس نے اس پر دھرنا دیے ہوئے پرینکا گاندھی کو حراست میں لے کر نا معلوم مقام پر منتقل کردیا جب کہ بھارت کے اردو ذرائع ابلاغ نے دعویٰ کیا ہے کہ کانگریس کی جنرل سیکریٹری کو چنار لے جایا گیا ہے۔

اندرا گاندھی کے پوتے راہل گاندھی نے اپنی بہن کو حراست میں لیے جانے پر کہا ہے کہ متاثرین کے کنبے سے ملنے کے لیے جانے والی پرینکا گاندھی کو حکومتی طاقت کے ذریعے روکنا دراصل موجودہ حکومت کے عدم تحفظ کا مظہر ہے۔

بھارت کے ذرائع ابلاغ کے مطابق پرینکا گاندھی اس سے قبل زخمیوں کو دیکھنے وارانسی پہنچی تھیں جہاں انہوں نے زخمیوں کی عیادت کی اوران سے خیریت دریافت کی۔

اترپردیش کے علاقے سون بھدر کے مورتیا گاؤں میں زمین کے تنازع پر ہونے والی فائرنگ نے دس افراد کی جان لے لی تھی جب کہ 25 زخمی ہوئے تھے جو اسپتال میں زیر علاج ہیں۔

بھارت کے ذرائع ابلاغ کے مطابق پرینکا گاندھی نے پولیس حراست میں روانگی سے قبل کہا کہ انہیں نہیں معلوم کہ پولیس کہاں لے جارہی ہے؟ لیکن وہ جارہی ہیں اور خاموش ہیں۔ ان کا کہنا تھا کہ یوگی حکومت کچھ بھی کرلے ہمارا سر نہیں جھکے گا۔